214 വനിതാ അങ്കണവാടി ജീവനക്കാർക്ക് 'പ്രതീക്ഷ' പദ്ധതി പ്രകാരം സൗജന്യ കാൻസർ പരിശോധന തുടങ്ങി

ഐ.സി.ഡി.എസ് ഏറ്റുമാനൂർ പ്രോജക്ടിന്റെയും കാരിത്താസ് ആശുപത്രിയുടെയും സംയുക്താഭിമുഖ്യത്തിൽ അങ്കണവാടി ജീവനക്കാർക്കായി 'പ്രതീക്ഷ' കാൻസർ നിർണയ പദ്ധതിക്ക് തുടക്കമായി. കാരിത്താസ് ആശുപത്രിയിലെ ഡയമണ്ട് ജൂബിലി കോൺഫറൻസ് ഹാളിൽ പദ്ധതിയുടെ ഉദ്ഘാടനവും കാൻസർ ബോധവത്കരണ ക്ലാസും നടന്നു. പദ്ധതിയുടെ ഭാഗമായി 214 വനിതാ അങ്കണവാടി ജീവനക്കാർക്ക് ഗർഭാശയഗള കാൻസർ നേരത്തേ കണ്ടെത്തുന്നതിനുള്ള പാപ് സ്മിയർ പരിശോധനയും സ്തനാർബുദ നിർണയത്തിനുള്ള മാമോഗ്രാം പരിശോധനയും സൗജന്യമായി ലഭ്യമാക്കും. കാൻസർ സാധ്യതകൾ പ്രാരംഭഘട്ടത്തിൽ തന്നെ തിരിച്ചറിയുക, ആവശ്യമായ തുടർപരിശോധനകളും ചികിത്സയും ഉറപ്പാക്കുക എന്നതാണ് പദ്ധതിയുടെ പ്രധാന ലക്ഷ്യം.