യു.എസിൽ കൊല്ലപ്പെട്ട മലയാളി യുവതികളുടെ മൃതദേഹങ്ങൾ നാട്ടിലെത്തി; സംസ്കാര ചടങ്ങുകൾ കോട്ടയത്തും തൃശൂരിലുമായി നടക്കും

യു.എസിൽ കൊല്ലപ്പെട്ട മലയാളി യുവതികളായ അഞ്ജന, ആൻ മേരി മാത്യു എന്നിവരുടെ മൃതദേഹങ്ങൾ കൊച്ചി നെടുമ്പാശ്ശേരി അന്താരാഷ്ട്ര വിമാനത്താവളത്തിലെത്തി. ആൻ മേരി മാത്യുവിന്റെ മൃതദേഹം വിമാനത്താവളത്തിൽ നിന്ന് കോട്ടയത്തെ ഭർതൃവീട്ടിലേക്ക് കൊണ്ടുപോയി. മൃതദേഹം ഇന്ന് കോട്ടയത്തെ സ്വകാര്യ ആശുപത്രി മോർച്ചറിയിൽ സൂക്ഷിച്ച ശേഷം ചൊവ്വാഴ്ച രാവിലെ 11-ഓടെ സംസ്കാര ചടങ്ങുകൾ നടക്കും. തൃശൂർ സ്വദേശിനിയായ അഞ്ജനയുടെ മൃതദേഹം വിലങ്ങന്നൂരിലെ ഭർതൃവീട്ടിൽ പൊതുദർശനത്തിന് വെച്ചു. വൈകുന്നേരത്തോടെ മണ്ണുത്തിയിലെ സ്വന്തം കുടുംബവീട്ടിലേക്ക് കൊണ്ടുപോകുന്ന മൃതദേഹം അവിടെവെച്ച് സംസ്കരിക്കും.