മറവിരോഗം ബാധിച്ച 93കാരിക്ക് തുണയായി 76കാരിയായ സഹോദരിയെ ഗാർഡിയനായി നിയമിക്കാൻ ഹൈക്കോടതി അനുമതി

അൽഷിമേഴ്സ് ബാധിച്ച് ദൈനംദിന കാര്യങ്ങൾ നിർവഹിക്കാൻ കഴിയാത്ത 93കാരിയായ അവിവാഹിതയുടെ ഗാർഡിയനായി 76കാരിയായ സഹോദരിയെ നിയമിക്കാൻ ഹൈക്കോടതി അനുമതി നൽകി. ബാങ്ക് അക്കൗണ്ടുകൾ ഉൾപ്പെടെയുള്ള സാമ്പത്തിക കാര്യങ്ങൾ കൈകാര്യം ചെയ്യാൻ രോഗിക്ക് സാധിക്കാത്ത സാഹചര്യം പരിഗണിച്ചാണ് ജസ്റ്റിസ് ബെച്ചു കുര്യൻ തോമസിന്റെ നിർണായക ഉത്തരവ്. ഗാർഡിയനായി നിയമിക്കപ്പെട്ട സഹോദരി പണം എങ്ങനെ വിനിയോഗിക്കുന്നു എന്നത് സംബന്ധിച്ച് ആറ് മാസത്തിലൊരിക്കൽ ഹൈക്കോടതിയിൽ റിപ്പോർട്ട് സമർപ്പിക്കണം എന്നും പണം നിയമാനുസൃതമായ ആവശ്യങ്ങൾക്ക് മാത്രമെ ഉപയോഗിക്കാവൂ എന്നും കോടതി കർശന നിർദ്ദേശം നൽകി.