ദേശീയ കഥകളി മഹോത്സവത്തിന് നാളെ സമാപനം; നിറഞ്ഞ സദസ്സിൽ ‘കല്യാണസൗഗന്ധികം’

കഥകളിയുടെ പൈതൃകഭൂമിയായ മുഴക്കുന്ന് ശ്രീ മൃദംഗശൈലേശ്വരി ക്ഷേത്രാങ്കണത്തിൽ ഒരാഴ്ചയായി അരങ്ങേറുന്ന കോട്ടയത്ത് തമ്പുരാൻ ദേശീയ കഥകളി മഹോത്സവത്തിന് വെള്ളിയാഴ്ച ധനാശിയോടെ സമാപനം. കോട്ടയത്ത് തമ്പുരാന്റെ വിഖ്യാത ആട്ടക്കഥകളെ ആസ്പദമാക്കിയുള്ള ഈ മഹോത്സവം സാംസ്കാരിക സംഗമമായി മാറി. ബുധനാഴ്ച അരങ്ങേറിയ ‘കല്യാണസൗഗന്ധികം’ കഥകളിയുടെ അവസാനഭാഗം നിറഞ്ഞ സദസ്സിൽ ശ്രദ്ധേയമായി. ഭീമനും ഹനുമാനും തമ്മിലുള്ള കൂടിക്കാഴ്ചയും തുടർന്നുണ്ടാകുന്ന സംഭവവികാസങ്ങളും ആവേശകരമായി അവതരിപ്പിച്ചു.