മണ്ണിടിച്ചിലിലും ഗതാഗതക്കുരുക്കിലും കുടുങ്ങിയ പള്ളം സ്‌കൂളിലെ വിനോദയാത്ര സംഘം സുരക്ഷിതർ

കോട്ടയം: ഊട്ടി-മേട്ടുപ്പാളയം റോഡിൽ കനത്ത മഴയെത്തുടർന്നുണ്ടായ മണ്ണിടിച്ചിലിലും ഗതാഗതക്കുരുക്കിലും കുടുങ്ങിയ പള്ളം ബുക്കാനാ ഗേള് സ് ഹൈസ് സ്കൂളിലെ വിനോദയാത്ര സംഘം സുരക്ഷിതരാണ്. സ്കൂളിൽ നിന്ന് വിനോദയാത്ര പോയ 78 വിദ്യാർത്ഥികളും എട്ട് അധ്യാപകരുമാണു യാതൊരു അപകടവുമില്ലാതെ രക്ഷപ്പെട്ടത്. വെള്ളിയാഴ്ച രാത്രി കോട്ടയത്തേക്ക് തിരിച്ചുപോരുന്നതിനിടയാണു സംഘം റോഡിൽ കുടുങ്ങിയത്. രക്ഷപ്പെടുത്തിയ കുട്ടികളെയും അധ്യാപകരെയും ഉടൻ തന്നെ മേട്ടുപ്പാളയത്തെ ഒരു സ്കൂളിലേക്കു മാറ്റി. കുട്ടികൾക്ക് ആവശ്യമായ ഭക്ഷണവും കുടിവെള്ളവുമെല്ലാം തമിഴ്നാട് അധികൃതർ എത്തിച്ചു നൽകിയതായി അധ്യാപകർ അറിയിച്ചു.