ഫ്രൂട്ട്സ്റ്റാളിൽ മോഷണം നടത്തിയ പ്രതിയെ അറസ്റ്റ് ചെയ്തു

വടശ്ശേരിക്കരയിലെ ഫ്രൂട്ട്സ്റ്റാളിൽ നിന്ന് പണം, സിസിടിവി വൈഫൈ മോഡൽ, വാച്ച്, ബ്ലൂടൂത്ത് സ്പീക്കർ, കത്തി എന്നിവ മോഷ്ടിച്ച പ്രതിയെ വടശ്ശേരിക്കരയിൽ നിന്ന് പിടികൂടി. കോട്ടയം എരുമേലി സ്വദേശിയായ സുമേഷ് മോഹനൻ (31) ആണ് പെരുനാട് പോലീസിന്റെ പിടിയിലായത്. തിങ്കളാഴ്ച രാത്രിയാണ് വടശ്ശേരിക്കര മണിയാറ്റ് പ്ലാസയ്ക്ക് സമീപം നടന്ന മോഷണം. മോഷണം നടന്ന സ്ഥലത്തുനിന്ന് ലഭിച്ച സൂചനകൾ വേഗത്തിൽ പ്രതിയെ കണ്ടെത്താൻ പോലീസിന് സഹായകമായി. ഇയാൾ കോട്ടയം ജില്ലയിലെ എരുമേലി, കാഞ്ഞിരപ്പള്ളി, കോട്ടയം വെസ്റ്റ് തുടങ്ങിയ പോലീസ് സ്റ്റേഷനുകളിലും മോഷണക്കേസുകളിൽ പ്രതിയാണെന്നും ജയിൽ ശിക്ഷ അനുഭവിച്ചിട്ടുണ്ടെന്നും പോലീസ് അറിയിച്ചു.