കാർത്തികപ്പള്ളിയിൽ പോഷകാഹാരക്കുറവ് മൂലം രണ്ടു വയസ്സുകാരൻ മരിച്ചു

കാർത്തികപ്പള്ളിയിൽ പോഷകാഹാരക്കുറവ് മൂലം രണ്ടു വയസ്സുകാരൻ മരിച്ചു. പോസ്റ്റ്‌മോർട്ടം റിപ്പോർട്ട് അനുസരിച്ച്, കുട്ടിക്ക് മതിയായ തൂക്കം ഉണ്ടായിരുന്നില്ല. ആവശ്യമായ 12 കിലോ തൂക്കം ഉണ്ടായിരിക്കേണ്ടിടത്ത് ഏഴ് കിലോ മാത്രമാണ് കുട്ടിക്ക് ഉണ്ടായിരുന്നത്. രക്തക്കുറവിന്റെ പ്രശ്‌നങ്ങളും കുട്ടിക്ക് ഉണ്ടായിരുന്നു. മതിയായ പരിപാലനം കിട്ടാത്തതാണ് കുഞ്ഞിന്റെ മരണകാരണമെന്നാണ് നിഗമനം. കാർത്തികപ്പള്ളി മഹാദേവികാട് താമസിക്കുന്ന രാജേഷ്-താര ദമ്പതികളുടെ രണ്ടു വയസ്സുള്ള മകന്‍ രാഹുല്‍ ഞായറാഴ്ച രാവിലെയാണ് മരിച്ചത്. താരയെ പ്രസവത്തിനായി ആശുപത്രിയില്‍ പ്രവേശിപ്പിച്ചതിന് പിന്നാലെയാണ് രണ്ട് വയസ്സുള്ള കുട്ടിയുടെ മരണം. നാട്ടുകാരുടെ പരാതി പ്രകാരം ദമ്പതികളെ പത്തനാപുരത്തെ സംരക്ഷണകേന്ദ്രത്തിലേക്ക് മാറ്റിയിരുന്നു. പിന്നീട് സ്വന്തം ഇഷ്ടപ്രകാരം വാടകയ്ക്ക് താമസിക്കുകയായിരുന്നു ദമ്പതികൾ. ഇതിനിടയിലാണ് രണ്ടു വയസ്സുകാരൻ മരിച്ചത്.