ശബരിമല തീർത്ഥാടനം അരികിൽ; എരുമേലി അമ്പലക്കടവിൽ മാലിന്യം അടിഞ്ഞുകൂടി

മണ്ഡല-മകരവിളക്ക് തീർത്ഥാടന സീസൺ ആരംഭിക്കാൻ ദിവസങ്ങൾ മാത്രം ബാക്കിനിൽക്കെ, എരുമേലി വലിയമ്പലത്തിന് സമീപത്തെ തീർത്ഥക്കടവിൽ വ്യാപകമായി മാലിന്യം അടിഞ്ഞുകൂടി ഭക്തർക്കിടയിലും നാട്ടുകാരിലും കടുത്ത ആശങ്ക സൃഷ്ടിക്കുന്നു. ശക്തമായ മഴയെ തുടർന്നാണ് വലിയതോതിൽ പ്ലാസ്റ്റിക് മാലിന്യങ്ങളും ചെളിയും ഒഴുകിയെത്തി കടവിൽ അടിഞ്ഞുകൂടിയത്. കടവിലെ മാലിന്യങ്ങളും എക്കലും എത്രയും വേഗം നീക്കം ചെയ്ത് ശുചിത്വം ഉറപ്പാക്കാൻ ദേവസ്വം ബോർഡും പ്രാദേശിക ഭരണകൂടവും അടിയന്തര നടപടി സ്വീകരിക്കണമെന്ന് നാട്ടുകാരും ഭക്തജനങ്ങളും ആവശ്യപ്പെട്ടു.