കുട്ടിക്കാനം-മുണ്ടക്കക്കയം പാതയിലെ ഓയിൽ ചോർച്ചയിൽ നിരവധി വാഹനങ്ങൾ അപകടത്തിൽ

കുട്ടിക്കാനം-മുണ്ടക്കക്കയം പാതയിലെ പെരുവന്താനം ഭാഗത്ത് റോഡിൽ വൻതോതിൽ ഓയിൽ പടർന്നതിനെത്തുടർന്ന് നിരവധി വാഹനങ്ങൾ അപകടത്തിൽപ്പെട്ടു. ഇന്ന് രാവിലെയാണ് സംഭവം. റോഡിലെ വഴുക്കലിൽപ്പെട്ട് തെന്നിമറിഞ്ഞ ഇരുചക്രവാഹനങ്ങളിലെ യാത്രക്കാർക്ക് പരുക്കേറ്റിട്ടുണ്ട്. വലിയ വാഹനത്തിൽ നിന്നാണ് റോഡിലേക്ക് വൻതോതിൽ ഓയിൽ ചോർന്നതെന്നാണ് പ്രാഥമിക നിഗമനം. പെരുവന്താനം പോലീസും ഫയർഫോഴ്സും സ്ഥലത്തെത്തി ഓയിൽ കഴുകി മാറ്റി സുരക്ഷിതമാക്കാനുള്ള നടപടികൾ ആരംഭിച്ചു. പാതയിലൂടെ കടന്നുപോകുന്ന വാഹനങ്ങൾ വേഗത കുറച്ച് ജാഗ്രത പാലിക്കണമെന്ന് പോലീസ് മുന്നറിയിപ്പ് നൽകി.