രാസലഹരിയും 15 ലക്ഷം രൂപയുമായി ഫാഷൻ ഫോട്ടോഗ്രഫർ പിടിയിൽ

ഒരു വലിയ രാസലഹരി ശേഖരവുമായി പ്രമുഖ ഫാഷൻ ഫോട്ടോഗ്രഫറെ എറണാകുളം എക്സൈസ് സ്ക്വാഡ് പിടികൂടി. കോട്ടയം പാമ്പാടി പുതക്കുഴിയിൽ വീട്ടിൽ അരുൺ കെ. നായർ (34) ആണ് കാക്കനാട് വെച്ച് എക്സൈസിന്റെ വലയിലായത്. ഇയാളിൽ നിന്ന് 38.13 ഗ്രാം രാസലഹരിയും കാറിൽ സൂക്ഷിച്ചിരുന്ന 15 ലക്ഷത്തിലധികം രൂപയും എക്സൈസ് സംഘം പിടിച്ചെടുത്തു. സംഭവത്തിൽ സമഗ്രമായ അന്വേഷണം ആരംഭിച്ചിട്ടുണ്ടെന്നും കേസിൽ കൂടുതൽ അറസ്റ്റുകൾ ഉണ്ടാകാൻ സാധ്യതയുണ്ടെന്നും ഡെപ്യൂട്ടി എക്സൈസ് കമ്മിഷണർ പികെ സതീഷ് അറിയിച്ചു.