ശബരിമല തീർത്ഥാടനത്തിനുള്ള ഒരുക്കങ്ങൾ എരുമേലിയിൽ സ്പെഷൽ കമ്മീഷണർ വിലയിരുത്തി

മണ്ഡലകാല തീർത്ഥാടനത്തിന് ഇനി 15 ദിവസങ്ങൾ മാത്രം ബാക്കിനിൽക്കെ, എരുമേലി ക്ഷേത്രത്തിലെ ഒരുക്കങ്ങൾ നേരിട്ടു കണ്ട് വിലയിരുത്തി ശബരിമല സ്പെഷൽ കമ്മീഷണർ സ്പെഷൽ ജഡ്ജ് ആർ ജയകൃഷ്ണൻ. ക്ഷേത്രമുറ്റത്ത് ഇന്റർലോക്ക് പാകുന്ന പണികൾ, പെയിന്റിങ്, വലിയതോടും പരിസരവും ശുചീകരിക്കുന്ന പ്രവർത്തനങ്ങൾ എന്നിവ അദ്ദേഹം നേരിട്ട് പരിശോധിച്ചു. 14 കോടി രൂപ ചെലവഴിച്ച് നിർമ്മിച്ച പുതിയ കെട്ടിടത്തിന്റെ ഉദ്ഘാടനവും തുറന്നുകൊടുക്കലും സംബന്ധിച്ച അന്തിമ തീരുമാനം ഉടൻ ഉണ്ടാകുമെന്ന് അധികൃതർ അറിയിച്ചു.