കോട്ടയം മെഡിക്കൽ കോളേജ് ആശുപത്രിയിൽ മെച്ചപ്പെട്ട തൊഴിൽ സാഹചര്യം വേണമെന്ന് മനുഷ്യാവകാശ കമ്മീഷൻ

കോട്ടയം മെഡിക്കൽ കോളേജ് ആശുപത്രിയിൽ സൗഹാർദ്ദപരവും പരസ്പര ബഹുമാനത്തിലധിഷ്ഠിതവുമായ തൊഴിൽ സാഹചര്യം സൃഷ്ടിക്കേണ്ടത് ബന്ധപ്പെട്ട എല്ലാവരുടെയും ഉത്തരവാദിത്തമാണെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് പറഞ്ഞു. ഔദ്യോഗിക ചുമതലകൾ സംബന്ധിച്ച അഭിപ്രായവ്യത്യാസങ്ങൾ വ്യക്തിപരമായ തർക്കങ്ങളിലേക്കോ അനാവശ്യ സംഘർഷങ്ങളിലേക്കോ നയിക്കാതെ പരസ്പരസംയമനത്തോടെയും സഹകരണത്തോടെയും പരിഹരിക്കണമെന്ന് അദ്ദേഹം ഉത്തരവിട്ടു. 60% ചലനവൈകല്യമുള്ള ഒരു ജീവനക്കാരിയുടെ പരാതിയിലാണ് നടപടി നടന്നത്. തനിക്കെതിരെ വ്യക്തിപരമായ അധിക്ഷേപങ്ങൾ നടത്തുന്നതിനെക്കുറിച്ചും കള്ള പരാതികൾ നൽകുന്നതിനെക്കുറിച്ചും പരാതിയിൽ പറയുന്നു.