ഉഴവൂർ പോലീസ് എയ്ഡ് പോസ്റ്റ് പ്രവർത്തനം ശക്തിപ്പെടുത്താൻ സർക്കാർ; ക്രമസമാധാന പാലനത്തിനായി താൽക്കാലിക ക്രമീകരണങ്ങൾ

ഉഴവൂർ പോലീസ് എയ്ഡ് പോസ്റ്റിന്റെ പ്രവർത്തനം പൂർണ്ണതോതിൽ പുനഃസ്ഥാപിക്കുന്നത് സംബന്ധിച്ച് ആഭ്യന്തര വകുപ്പ് ഔദ്യോഗിക നിലപാട് വ്യക്തമാക്കി. കുറവിലങ്ങാട് പോലീസ് സ്റ്റേഷനിലേക്ക് അധിക അംഗബലം ലഭിക്കുന്ന മുറയ്ക്ക് എയ്ഡ് പോസ്റ്റിലേക്ക് കൂടുതൽ ജീവനക്കാരെ നിയോഗിച്ച് പ്രവർത്തനം കൂടുതൽ കാര്യക്ഷമമാക്കുമെന്ന് സംസ്ഥാന പോലീസ് മേധാവി അറിയിച്ചു. ഉഴവൂർ സ്വദേശിയായ ബെയ്ലോൺ എബ്രാഹം വെട്ടിമറ്റത്തിൽ ആഭ്യന്തര വകുപ്പ് മന്ത്രിക്ക് സമർപ്പിച്ച നിവേദനത്തിന്റെ അടിസ്ഥാനത്തിലാണ് ഈ നടപടി. നിലവിൽ, കുറവിലങ്ങാട് പോലീസ് സ്റ്റേഷനിൽ നിന്ന് സബ് ഇൻസ്പെക്ടറുടെ നേതൃത്വത്തിലുള്ള പ്രത്യേക ബൈക്ക് പെട്രോളിംഗ് ദിവസേന ഉഴവൂർ എയ്ഡ് പോസ്റ്റിലെത്തും. ഉഴവൂർ വില്ലേജ് അതിർത്തിക്കുള്ളിൽ ക്രമസമാധാന പാലനം ഉറപ്പാക്കാൻ ഈ സംഘം നിരന്തരം പെട്രോളിംഗ് നടത്തും.