ഓണംതുരുത്തിൽ മോഷ്ടാക്കളുടെ വിളയാട്ടം; രാത്രിയിൽ പുറത്തിറങ്ങാൻ ഭയന്ന് നാട്ടുകാർ

നീണ്ടൂർ ഗ്രാമപഞ്ചായത്തിലെ ഓണംതുരുത്ത് പ്രദേശത്ത് രാത്രികാല മോഷണശല്യവും സാമൂഹികവിരുദ്ധ പ്രവർത്തനങ്ങളും വർധിക്കുന്നതായി പരാതിയുയർന്നു. പഞ്ചായത്തിലെ അഞ്ചാം, ആറാം വാർഡുകളിലായി കഴിഞ്ഞ ഏതാനും ദിവസങ്ങൾക്കിടെ പത്തോളം വീടുകളിൽ മോഷണം നടന്നതായും മോഷണശ്രമങ്ങൾ ആവർത്തിക്കുന്നതായും നാട്ടുകാർ പറയുന്നു. കൈപ്പുഴ കവലയിൽനിന്ന് ഓണംതുരുത്ത് പോസ്റ്റ് ഓഫീസ് റോഡിലേക്കുള്ള ഭാഗത്താണ് മോഷണശ്രമങ്ങൾ ഉണ്ടായതെന്നാണ് പരാതി. സംഭവങ്ങൾ ആവർത്തിച്ചിട്ടും പോലീസ് നടപടികൾ സ്വീകരിക്കുന്നില്ലെന്നും നാട്ടുകാർ ആക്ഷേപിക്കുന്നു. പ്രദേശത്ത് രാത്രികാല പോലീസ് പട്രോളിങ് കാര്യക്ഷമമല്ലെന്നും അവർ ആരോപിക്കുന്നു.